Sajt “Eurohoops“ izabrao je, po njima deset najboljih ljevorukih košarkaša u novijoj istoriji Evrolige.

Paulijus Jankunas

Već 17 godina Paulijus Jankunas igra na najvećoj sceni. Sa izuzetkom sezone 2009/2010 kada je nastupao za Himki, preostali dio profesionalne karijere proveo je u Žalgirisu. Sa timom iz Litvanije igrao je prije dvije godine na Fajnal foru u Beogradu i tada je uvršten u drugu najbolju petorku te sezone. U Evroligi je odigrao preko 300 utakmica i igrač je sa najviše skokova u istoriji ovog takmičenja (1.816). Krasi ga dobar šut sa distance.

Dimtris Dijamantidis

Legenda evropske košarke. Nakon početka u Iraklisu, došao u Panatinaikos 2004. godine gdje je ostao do kraja karijere. Sa “zelenima“ iz Atine tri puta osvojio Evroligu. MVP regularnog dijela bio 2011. Iste godine izabran i za MVP-a Fajnal fora, a tu nagradu osvojio je i 2007. Čak šest puta u karijeri je izabran za najboljeg defanzivca u Evropi. Treći na vječnoj listi asistenata u ovom takmičenju (1.255). Igrač sa najviše ukradenih lopti u Evroligi (434).

Kit Lengford

Jedan od najubojitijih ljevorukih igrača koji su igrali u Evroligi. U ovom takmičenju nastupao je devet godina za Himki, Armani, Makabi, Uniks i Panatinaikos. Dva puta osvojio je nagradu “Alonso Ford“ za najefikasnijeg košarkaša u sezoni. Prije šest godina izabran u idealnu petorku ovog takmičenja.

Jaka Lakovič

Jedan od najboljih slovenačkih košarkaša. Evroliga ga je upoznala u sezoni 2001/2002 kada je nastupao za Krku. Iz Novog Mesta odlazi u Panatinaikos. Sa Atinjanima nije osvojio Evroligu, ali jeste sa Barselonom 2010. godine. U Evroligi je igrao i u dresu Galatasaraja.

Pit Mikel

I Mikel je u dresu Barselone 2010. osvojio Evroligu. U finalu protiv Olimpijakosa ubacio 14 poena uz pet skokova. U Barsu je došao iz Tau Keramike (današnje Baskonije). Sa timom iz Vitorije 2008. osvojio špansku ligu i izabran za MVP-a finalne serije. Karijeru završio u 39. godini.

Kostas Papanikolau

Još jedan dobar defanzivac. Sa Olimpijakosom dva puta osvojio Evroligu (2012. i 2013.) U čuvenom finalu 2012. protiv CSKA kada je Olimpijakos nakon preokreta osvojio Evroligu bio najbolji pojedinac sa 18 poena. Naredne sezone osvojio nagradu “Zvijezda u usponu“ Evrolige.

Tajris Rajs

Jedan od najzaslužnijih za evropsku titulu Makabija 2014. godine. Te godine obilježio je evroligašku sezonu. Bio je MVP Fajnal fora, a blistao je u finalu protiv Reala kada je ubacio 26 poena. U Evroligi je igrao još za Himki, Barselonu i Panatinaikos.

Entoni Rendolf

Amerikancu je prvi tim u Evropi bila Lokomotiva iz Kubanja. Igrama u Rusiji skrenuo pažnju evropske javnosti, pa dres Real Madrida oblači 2016. godine. Sa Madriđanima je prije dvije godine osvojio Evroligu.

Kostas Slukas

Još jedan ljevoruki košarkaš iz Grčke. U karijeri tri puta osvojio Evroligu (dvije titule sa Olimpijakosom, jedna sa Fenerbahčeom). U Atini je sarađivao sa Vasilisom Spanulisom od koga je “pokupio“ mnoge karakteristike. Kao igrač sazrio je kod Željka Obradovića u Fenerbahčeu i jedan je od igrača koji su bili okosnica turskog tima prethodnih sezona.

Manu Đinobili

Argentinac je legenda svjetske košarke. U Evroligi je igrao svega dvije sezone, ali dovoljno da ostane upamćen kao jedan od vrhunskih košarkaša koji su nastupali u tom takmičenju. Bilo je to od 2000. do 2002. u dresu Kindera iz Bolonje. Sa italijanskim timom 2001. osvojio Evroligu. Tada je izabran za MVP-a finalne serije.  

Leave a Reply