Nakon velike pobjede nad Hapoleom, kojom su ostali u igri za plej of Evrokupa – košarkaši Budućnosti okreću se ABA ligi.
“I ova utakmica dolazi poslije teškog meča u Evrokupu, tako da mislim da je pristup bitniji od taktike i ostalih stvari”, jasan je Andrej Žakelj, trener Budućnosti.
“Plavi” u subotu gostuju na “Gripama” eks Ju velikanu Splitu u 17. kolu regionalnog takmičenja.
Budućnost je apsolutni favorit protiv Splita, u nizu je od sedam pobjeda zaredom u ABA ligi, dok je na posljednjih devet utakmica poražena samo od Bahčešehira u Evrokupu.
“Naravno, očekujem da pristup bude maksimalan, ali će energija malo biti problem poslje svega ovih dana. Prva stvar je da glave moraju da budu na mjestu”, dodao je Žakelj.
Split je promjenio trenera, a u dosadašnjem toku sezone je sakupio šest pobjeda.
“Split je uvijek neugodan protivnik, posebno na svom terenu. Uz promjenu trenera i igrači će sigurno da reaguju sa više zalaganja i energije. Očekujem tešku utakmicu, ali moramo da uradimo sve kako bismo bili maksimalno fokusirani i da dobijemo utakmicu”, jasan je slovenački stručnjak.
“Plavi” imaju skor 14-2.
“Znamo da je uvije teško kada se igra u Splitu, nekoliko dobrih igrača nosi dres tog kluba, a nedavno je stigao i novi trener… Odgledaćemo nekoliko snimaka da vidimo koliko su se prilagodili, ali poznajemo sastav od ranije i mislim da ćemo biti spremni”, poručio je Flečer Megi.
Meč se igra od 17 sati.
