Nakon reprezentativne pauze košarkaši Mornar Barskog zlata takmičenje u AdmiralBet ABA ligi nastavljaju pred svojom publikom.
Barani u petak od 19 sati igraju, protiv debitanta u prvoligaškom karavanu, ekipe Spartaka iz Subotice.
Prvi susret dobio je tim Vlade Jovanovića – 85:64.
“Imali smo vremena za odmor, iako se u prvom dijelu sezone nismo ni umorili, sudeći po rezultatima. Svaka utakmica do kraja nam je odlučujuća i svjesni smo toga. Tražim samo maksimalnu fokusiranost od svih igrača da bi osigurali opstanak. Spartak je izuzetno iskusna i jaka ekipa. Sigurno neće biti ni malo lako. Vrlo zahtjevna utakmica. Pokušaćemo potencijalne slabosti da iskoristimo da bi došli do pobjede, ali, ponavljam, neće biti ni malo lako”, kazao je trener Mihailo Pavićević.
Nakon 20. odigranih kola Mornar ima samo jednu pobjedu.
“Odmor nam je prijao i pomogao nam da se što bolje pripremimo za ovaj meč. Spartak je jak tim. Ključ naše potencijalne pobjede treba biti timska igra, distribucija lopte i da odigramo vrlo jaku odbranu”, rekao je Džamari Smit.
Ekipa neće moći da računa na povrijeđenog Čika Kartera. Klub su tokom reprezentativne pauze napustili, Ilija Đoković, Džejden Bedijako i Brendon Dženkins.
